Retrospettiva ta' Paul Haber

Fit-3 ta' Novembru 2018, infetħet il-wirja ta' Paul Haber fil-Gallerija Aldabra, fi SmartCity. F' din ir-Retrospettiva li b'unur qiegħda tippreżenta 37 skultura u installazzjoni, Haber isir l-awtur li jerħi l-ispirtu tiegħu fi tfittixa ta' disinji ġodda, id f' id mal-istint artistiku tiegħu. Skultura għaqlija, b' ambizzjoni fit-teknika u b' kuluri saturata li fi kliem l-artist, huma ''l-kuluri ta' Malta.''

Il-forom jirriflettu xbihat fin-natura, xi mdaqqiet karnali. Oħrajn juru r-rabta tal-artist mal-wirt kulturali ta' pajjiżu. Ir-Retrospettiva ta' Haber hija mixja f'żewġ vjaġġi paralleli; l-ewwel mixja hija matul l-esperjenzi tal-artist li jesebixxi b'tant dedikazzjoni u umilta` minn art twelidu, saħansita fiċ-ċentru ta' Pariġi f' Ġunju 2018. 

It-tieni mixja hi dik bejn dak li jesperjenzaw is-sensi viżwali fl-estetika u bejn is-sotto-konxju f'għarfien surrealista. L-artist qiegħed ipoġġi f'armonija disinji u kuluri avventurużi, fejn waqt li l-għajn tal-udjenza tiġri ma' dawn id-disinji, l-udjenza ssib ruħha f'mistoqsija quddiem dawn il-kompożizzjonijiet ġodda. 

Tispikka l-liberta` tal-artist f'dawn ix-xogħlijiet li mhumiex ristretti anzi qalbiena.  Il-kunfindenza u l-esperjenza tal-artist fil-ħidma taċ-ċeramika, tippermettilu jintilef fil-produzzjoni artistika waqt li jħaddan id-dixxiplina fit-teknika, u joħloq b'għożża kompożizzjonijiet b'karatteristiċi individwali.  
​
Paul Haber ggradwa fiċ-ċeramika mill-Kulleġġ tal-Art Ċentrali ta' St. Martin f'Londra wara studji intensivi fl-arti u l-iskultura f'Malta, l-Italja u r-Renju Unit.

Ħajr speċjali lil ​The AV Warehouse